Mat 16 | KYG | STEP | Mago Falasi mono vaya'e Satiyusi mono vaya'mogi'e'mo Yesutegamo e'a amalageka hu'apae'mo, koku'napi himamukaleti'mo alagena kava'mo hugeta ageno, hu'a ha pai'nae.

Matthew 16

Yesufe'mo kaune kava'mo hugeta ageno, hu'a hu'naya gemae

(Mak 8:11-13; Luk 12:54-56)

1 Mago Falasi mono vaya'e Satiyusi mono vaya'mogi'e'mo Yesutegamo e'a amalageka hu'apae'mo, koku'napi himamukaleti'mo alagena kava'mo hugeta ageno, hu'a ha pai'nae. 2 Yesu'a ge'apile'mo aeno atagaina huno hapa paino'ae'mo, yegemo lamino nefalegeno'ae'mo hiya'mo'a alino haesa nehigetapa agetetapae'mo, egamo alagepa ko aligiye, hutapa nehae. 3 Yegemo haine ne'egeno'ae'mo koku'nategamo alino hani'ageke'mo nehigeno haesa ko'mo aligetapa agetetapae'mo, hemenimo ko aigiye, hutapa nehae. Lapakaemo koku'natega afole ne'aiya alagena kava'mo alitapa fako hutapa ne'agaya'monanafa hemenimo afole ne'aiya alagena kava'mo alitapa fako hutapa afole aisiya kava'mo afa'a no'agae. 4 Hosu vaya'mogimo Goti'apimona atale'a kumai he'a ugekana kava nehaya vaya'mogi alagena kava'mo agesayafe'mo nehaya'monanafa alagena kava'mo alino apave oligiya'monanafa Gotitegati gemo alinineno aeno hakalo huno hapa nepaiya vekamo Yona'a hu'niya alagena kava'amo alino apave ligiye, huno hapa paiteno apataleno u'niye.

Peleti maya falaova mumusopafi ne'ataya yafe'mo aeno kalafefa gemo hu'niya gemae

(Mak 8:14-21)

5 Ge'amo ne'afiya vaya'mogimo ago apake kani'nige'a peleti mayamo o'ali'a atale'a ani kotute'mo sipifi'mo u'nae. 6 Yesu'a, Falasi mono vaya'mogi peleti maya falaova mumusopafi ne'ataya ya'e Satiyusi mono vaya'mogi peleti maya falaova mumusopafi ne'ataya ya'efe'mo ehetapiye, huno hapa pai'niye. 7 Apakaemo ge huge afige hu'apae'mo, lagaemo peleti mayamo o'alita ago ataleta ne'ona'mofe'mo mani gemo nehiye, hu'a hu'nae. 8 Yesu'a ge huge afige hu'naya gemo afiteno'ae'mo, na kava higetapa peleti mayamo o'ali'naya kavafe'mo ge huge afige hulitapa ne'ae. Aise'amo lapakesa afitapa fatago nehae. 9 Asole afina'mo afi'naya'monanafa afitapa aeto osu'nafiye. Nagaemo faefu'a peleti mayamo ali'na faefu tauseni'a vaya'mo apami'nogetapae'mo lapakaemo na magi hona yuvapafi'mo alita maleta havaite'nopi hutapa ago lapake kani'nifiye. 10 Ani kava hu'na seveni'a peleti mayamo ali'na fo tauseni'a vaya'mo apami'nogetapae'mo lapakaemo na magi alopa hona yuvapafi'mo alita maleta havaite'nopi hutapa ago lapake kani'nifiye. 11 Peleti mayae'mo nosuva'monanafa na kava higetapa o'afi'nae. Falasi mono vaya'mogi peleti maya falaova mumusopafi ne'ataya ya'e Satiyusi mono vaya'mogi peleti maya falaova mumusopafi ne'ataya ya'efe'mo ehetapiye, hu'na lapa nepauve, huno hapa pai'niye. 12 Ani gemo afite'apae'mo peleti maya falaova mumusopafi ne'ataya yafe'mo osu'nifa Falasi mono vaya'mogi ali'a apaya ne'malaya ge'e Satiyusi mono vaya'mogi ali'a apaya ne'malaya ge'efe'mo ehetapiye, huno hu'niye, hu'a hu'nae.

Pita'a Yesufe'mo Kalaisi ne'mo mai'nane, huno hu'niya gemae

(Mak 8:27-30; Luk 9:18-21)

13 Yesu'a Sisaliya Filipai taoni haopalegamo uno mai'neno'ae'mo ge'amo ne'afiya vaya'aife'mo, apakaemo vaya'mogimo Vemo mafa'ne'ae'mo ina la'ae, hu'a nehae, huno apafi ge'nige'apae'mo, 14 mago vaya'amogi hu'apae'mo, Yoni'a ani faleno ne'apateya vekamo mai'niye, hu'a huge mago vaya'amogi hu'apae'mo, Ilaiya'a mai'niye, hu'a huge mago vaya'amogi hu'apae'mo, Yelemaiya'a mai'niye, hu'a huge mago vaya'amogi hu'apae'mo, Gotitegati gemo alinineno aeno hakalo huno hapa nepaiya vekamo mai'niye, hu'a huge nehae, hu'a ha pai'nae. 15 Agaemo apakaefe'mo, lapakaemo nagaefe'mo, ina la'nae, hutapa nehae, huno apafi ge'nigeno'ae'mo 16 Saimoni Pita'a ge'ale'mo aeno atagaina huno'ae'mo, Kalaisi ne'mo mai'nane. Maige maige huno ne'maiya Goti mafa'ne'amo mai'nane, huno ha pai'niye. 17 Yesu'a ha paino'ae'mo, Saimoniyo Yona mafa'ne'amogae, mago ma mopafi vekamo'a ani kaipa kagesamo alino okami'nifa koku'napi Afo'nimo'a ani kaipa kagesamo alino kami'niye. Aulagale'mo alagepa huka mai'nananageka afa'a kamogaga aigane. 18 Pitagamo mai'nananage'na ani yafate'mo siosi'nimo fai'na atesuge'a siosi vaya'nimogi Satani lafile kita'amo ae'a yaki'a haigae. 19 Nagaemo Goti'a yagaino ne'apateya kote ki'mo ali'na kamisugeka ma mopafi mai'nekae'mo kita ki malesanageno'ae'mo ani kava huno koku'napi ne'mo'a kita ki malegaiye. Ma mopafi mai'nekae'mo kita yakisanana ani kava huno koku'napi ne'mo'a kita yaki malegaiye, huno ha paiteno 20 ge'amo ne'afiya vaya'aife'mo hapa paino'ae'mo, nagaefe'mo Kalaisi ne'mo mai'niye, hutapa hapa opaiyo, huno hapa pai'niye.

Yesu'a falite'na he tiguve, huno hapa pai'niya gemae

(Mak 8:31-9:1; Luk 9:22-27)

21 Yesu'a ani afinateti'mo ge'amo ne'afiya vaya'aife'mo aepa faino huno afole aino hapa paino'ae'mo, nagaemo Yulusalemu taonifi'mo u'na mai'nisuge'apae'mo vayatama vayanagi mono hu'a ne'apataya vaya'aite'mo yagai'a ne'apataya vayanagi ke'aepa gemo ali'a apaya ne'malaya vayanagi hu'a lusi hanageke ya'mo namitesage'na faliguve. Lole'e mago'e afina'mo utesigeno halate alino he tino nategaiye, huno hapa pai'niye. 22 Pita'a Yesu'mo amasage huno avalelino uno ge hauno'ae'mo, Ala kava nene, huno, Goti'a hau huno kateno. Mani hana agufa kava'mo kagaetegamo alagi afole o'aigiye, huno ge hau'niye. 23 Yesu'a aino afe leno ha paino'ae'mo, Sataniyo, kaune ho. Ka'nimo akanika natesanafe'mo hane. Goti agesamo o'ali'napa ma mopafi vaya'ai apakesamo ali'nane, huno ha pai'niye.

24 Huno ha paiteno Yesu'a ge'amo ne'afiya vaya'aife'mo hapa paino'ae'mo, mago vekamo'a nakame hisiyafe'mo hau'nisiyana agai'amo hau'nisiya kavafe'mo, ha'ao, o'nahau'niye, huno huteno ataleno agai'a malipu yosa'amo alino kofilino nakame hino. 25 Mago vekamo'a ma mopafi alagepa huno maisayafeke'mo agesa ne'afisiyana alagepa huno ne'maiya kava'amo atalegaiye. Mago vekamo'a nagaetefe'mo alagepa huno ne'maiya kava'amo atale'nisiyana alagepa huno maisiya ya'mo aligiye. 26 Mago vekamo'a muki ma mopafi ya'mo ali'nisigeno auneme'amo lageso hisiyana akamelegati mago'e ya'mo alisifiye. Ha'ao o'aligiye. Auneme'amo lageso hisiyana na agufa miyateti'mo halate miya faino aligiye. 27 Vemo mafa'nemo'a afo'amo ha le konali ya'amo aliteno enisole vaya'amogi'e'mo emineno'ae'mo ali'ya'apilefe'mo apamete apamete huno miya'apimo apamigiye. 28 Lama ge lapa nepauve, hemenimo mani kanale'mo mai'naya vayapati'mo mago vaya'amo ofali'nisageno Vemo mafa'nemo ala kini ne'apimo emineno yagaino apatesige'a agegae, huno hapa pai'niye.